286. Somewhere In Time (1980)

Director : Jeannot Scwarc

Genre : Drama

Rating : 7.3/10

Country : USA

Duration : 108 Minutes


🔸ഒരു മനുഷ്യന്റെ ഭൂത കാലത്ത് അവൻ കണ്ട കാഴ്ചകളും കടന്നു വന്ന അനുഭവങ്ങളും വർത്തമാന കാലത്തെ അവന്റെ സാഹചര്യങ്ങളും പ്രതികരണങ്ങളും ആണ് അവന്റെ ഭാവിയെ നിർണ്ണയിക്കുന്നത്. എന്നാൽ ആവശ്യാനുസരണം ഒരാൾക്ക് ഭൂതകാലത്തേക്കും ഭാവികാലത്തേക്കും കടന്ന് ചെല്ലാൻ കഴിഞ്ഞാൽ അത് വേറിട്ട ഒരു അനുഭവം തന്നെ ആയിരിക്കും എന്ന് നിസ്സംശയം പറയാം.

🔸ഭൂത കാലത്ത് ചെയ്ത തെറ്റുകളും അതിൽ നീറി പശ്ചാത്തപിച്ച് ജീവിക്കാൻ മറന്ന് പോയ ഒരുപാട് പേരുണ്ട് ലോകത്ത്. തങ്ങൾ സ്വപ്നം പോലും കാണാത്ത അവസ്ഥാന്തരങ്ങളിലൂടെ ആവും ചിലർക്ക് ഭാവിയിൽ കടന്ന് പോവേണ്ടി വരിക. ഇവയെല്ലാം തിരുത്താനും ഭാവിയിലെ തങ്ങളെ ഒരുനോക്ക് കാണാനും ഒരവസരം ലഭിച്ചാൽ ആരും അത് ഉപേക്ഷിക്കാൻ ഇടയില്ല. ടൈം ട്രാവൽ ചിത്രങ്ങളുടെ ഭംഗിയും അത് തന്നെ ആണ്.

🔸1972ലാണ് ചിത്രം ആരംഭിക്കുന്നത്. അമേരിക്കയിലെ പ്രശസ്തമായ ഒരു ഡ്രാമ സ്‌കൂളിൽ വിദ്യാർത്ഥിയാണ് റിച്ചാർഡ്. തന്റെ ആദ്യ നാടകം അരങ്ങിൽ എത്തിയതിന്റെ സന്തോഷത്തിൽ മതി മറന്ന് നിൽക്കവെയാണ് റിച്ചാർഡ് ആ വൃദ്ധയെ കാണുന്നത്. അവർ റിച്ചാർഡിനോട് ആവശ്യപ്പെട്ടത് ഒരേയൊരു കാര്യം മാത്രമായിരുന്നു ,തന്റെ അടുത്തേക്ക് മടങ്ങിവരാൻ.

🔸അതിന് മുൻപോ ശേഷമോ റിച്ചാർഡ് അവരെ കണ്ടിട്ടില്ല. അവർ ആരാണെന്ന് ഒരറിവും അയാൾക്കില്ല ,റിച്ചാർഡിന്റെ ഓർമയിൽ എവിടെയും അങ്ങനെ ഒരു മുഖം ഉണ്ടായിരുന്നില്ല. വർഷങ്ങൾ ഒരുപാട് കടന്നുപോയി ,ചോദ്യങ്ങൾ മാത്രം അവശേഷിച്ചു. ഉത്തരങ്ങൾക്ക് മറുപടി ഏതും നൽകാതെ ആ വൃദ്ധയും എന്നോ മണ്മറഞ്ഞുപോയി.

🔸പിന്നീടും ഒരുപാട് വർഷങ്ങൾക്ക് ശേഷമാണ് തന്റെ ഉള്ളിലെ ചോദ്യങ്ങൾക്കുള്ള മറുപടിയെന്നോണം ചില സൂചനകൾ റിച്ചാർഡിന് കിട്ടി തുടങ്ങിയത്. അവർ ,ആ വൃദ്ധ തന്റെ ഭൂതകാലത്ത് നിന്നും വന്നതാണ്. താൻ ഓർമിക്കാത്ത മറന്നുപോയ ചില കാര്യങ്ങൾ ഭൂതകാലത്ത് മറഞ്ഞുകിടപ്പുണ്ട്. അവ കണ്ടെത്തേണ്ടി ഇരിക്കുന്നു ,മടങ്ങി പോവേണ്ടി ഇരിക്കുന്നു.

Verdict : Very Good