323. I Am Not Madame Bovary (2016)

Director : Feng Xiaogang

Genre : Comedy

Rating : 7/10

Country : China

Duration : 137 Minutes


🔸മാഡം ബോവറി ഒരു തലവേദനയാണ് ,പ്രത്യേകിച്ചും അവരുടെ ഭർത്താവിനും ചൈനയിലെ നീതിപീഠത്തിനും ഗവണ്മെന്റിനും വരെ. ഒരു തരത്തിലും തങ്ങളുടെ നയങ്ങളുമായി അടുക്കാത്ത സന്ധിയില്ലാതെ പ്രതിഷേധം മാത്രം മുഖമുദ്രയായ ബോവറിക്ക് മുൻപിൽ ഒരുവേള എല്ലാവരും നിഷ്പ്രഭമായി പോവുകയാണ്. രണ്ടും കല്പിച്ച് ഇറങ്ങിയ ഒരു യുവതിയുടെ മുന്നിൽ വ്യവസ്ഥയും നിയമവും വരെ ഒന്നുമല്ലാതായിപ്പോയ നിമിഷം.

🔸ബോവറിയും ഭർത്താവും പരസ്പരം നിലനിന്നിരുന്ന രഹസ്യ ഉടമ്പടി പ്രകാരമാണ് പിരിയാൻ തീരുമാനിച്ചത് ,ചൈനയിൽ ദമ്പതികൾക്ക് വസ്തുവകകൾ കൈവശം വെക്കുന്നതിന് നിയന്ത്രണങ്ങൾ വന്ന സമയമായിരുന്നു അത്. നിയമത്തിന്റെ ആനുകൂല്യങ്ങൾ മുതലെടുക്കാൻ കണ്ടുപിടിച്ച പഴുതിന്റെ ബാക്കി പത്രമായിരുന്നു ഇരുവരും തമ്മിലുള്ള രഹസ്യ ഉടമ്പടിയും തുടർന്നുണ്ടായ ഡിവോഴ്‌സും സംഭവങ്ങളും ഒക്കെ.

🔸എന്നാൽ ബൊവെറി തന്റെ ഭർത്താവിനെ ഒട്ടും മനസ്സിലാക്കിയിരുന്നില്ല. കിട്ടിയ അവസരം പുള്ളിക്കാരൻ നന്നായി ഉപയോഗിച്ചു. കണ്ണടച്ച് തുറക്കുന്ന വേഗത്തിൽ ബൊവെറിയെ വെറുമൊരു കോമാളിയായി നിർത്തിക്കൊണ്ട് ടിയാൻ മറ്റൊരു കല്യാണം കഴിച്ചു കളഞ്ഞു. ബൊവെറിക്ക് കൊടുത്ത വാക്ക് കാറ്റിൽ പറത്തിക്കൊണ്ട് പുതിയ കുടുംബത്തോടൊപ്പം സന്തോഷമായി ജീവിതം ആരംഭിക്കുകയും ചെയ്തു ടിയാൻ.

🔸ഒരല്പം ഞെട്ടലും ,അപമാനവും സങ്കടവും ഒക്കെ തോന്നിയെങ്കിലും വിട്ടുകൊടുക്കാൻ ബൊവെറി തയാറായിരുന്നില്ല. തനിക്ക് കിട്ടേണ്ട നീതിക്ക് വേണ്ടി നിയമത്തിന്റെയും നീതി പീഠത്തിന്റെയും ഏതറ്റം വരെയും പോവാൻ അവർ തയാറായിരുന്നു ,എങ്കിലും പ്രശ്നങ്ങൾ കൂടുതൽ സങ്കീർണം ആവുകയാണ് ഉണ്ടായത്. ബൊവെറിയും ഭർത്താവും ഒരിക്കൽ പിരിഞ്ഞവരാണ്,ബൊവെറി കൊടുത്തിരിക്കുന്ന പരാതി നിയമപ്രകാരം ഉടമ്പടികൾ ഏതുമില്ലാതെ ഡിവോഴ്സ് അനുവദിച്ച് തരണം എന്നും.

🔸ഒരിക്കൽ പിരിഞ്ഞുപോയ ഭാര്യയ്ക്കും ഭർത്താവിനും നിയമപരമായി വീണ്ടും ഡിവോഴ്സ് നൽകണം എന്ന പരാതിയിന്മേൽ വന്ന കേസ് ഏത് രീതിയിൽ കൈക്കൊള്ളണം എന്നറിയാതെ മേല്പോട്ടും കീഴ്പോട്ടും നോക്കി അമ്പരന്ന് ഇരിക്കാനേ നീതിപീഠത്തിനും ,വക്കീലന്മാർക്കും പോലും സാധിച്ചുള്ളൂ. തനിക്ക് നീതി കിട്ടും എന്ന കാര്യത്തിൽ ബൊവെറിക്ക് വലിയ ഉറപ്പ് ഒന്നും ഉണ്ടായിരുന്നെങ്കിലും മുൻ ഭർത്താവിന്റെയും തന്റെയും ഭാവിയുടെ കാര്യത്തിൽ ചില തീരുമാനങ്ങൾ അവർ കൈക്കൊണ്ട് കഴിഞ്ഞിരുന്നു.

Verdict : Good