317. Cul De Sac (1966)

Director : Roman Polanski

Genre : Thriller

Rating : 7.2/10

Country : UK

Duration : 112 Minutes


🔸ദമ്പതിമാരായ തെരേസയെയും ജോർജിനെയും ആദ്യം സ്‌ക്രീനിൽ കാണിക്കുന്നത് തൊട്ടേ ഒരപായ സൂചന കിട്ടിത്തുടങ്ങുന്നുണ്ട് കാഴ്ചക്കാരന് ,എന്തോ എവിടെയോ ഒരു തകരാറ് ഉള്ളത് പോലെ. പ്രത്യക്ഷത്തിൽ വിശദീകരിക്കാൻ ബുദ്ധിമുട്ട് ആണെങ്കിൽ കൂടിയും എന്തൊക്കെയോ ഒളിപ്പിച്ച് വെക്കുന്ന മട്ടാണ് ഇരുവരുടെയും ചേഷ്ടകൾക്ക്. ലൈംഗികതയെ കുറിച്ചുള്ള അമിത സംഭാഷണങ്ങളും കാരണങ്ങളേതുമില്ലാത്ത വഴക്കുകളും ഇരുവരെയും ചുറ്റിപറ്റി നിൽക്കുന്ന നിഗൂഢത ഏറ്റുകയാണ്.

🔸വിചിത്രമായ രീതികളും ചേഷ്ടകളുമായി ദ്വീപിലെ തങ്ങളുടെ വസതിയിൽ ഇരുവരും കഴിഞ്ഞ് കൂടുമ്പോൾ നഗരത്തിന്റെ മറ്റൊരു ഭാഗത്ത് ഒരു ബാങ്ക് കൊള്ള അരങ്ങേറുകയാണ്. ഒട്ടും പ്രതീക്ഷാവഹമായ രീതിയിൽ അല്ല കൊള്ളയടി പ്രക്രിയ അരങ്ങേറിയത്. റിച്ചാർഡിനും ആൽബിക്കും തങ്ങളുടെ ജീവൻ തിരിച്ച് കിട്ടിയത് തന്നെ ഭാഗ്യം ഒന്ന് കൊണ്ട് മാത്രമാണ്. ആൽബിക്ക് വെടിയേറ്റിട്ടുണ്ടെന്ന് മാത്രമല്ല നന്നായി രക്തം പോവുന്നുമുണ്ട് ,എത്രയും പെട്ടെന്ന് വൈദ്യസഹായം നേടിയില്ലെങ്കിൽ മരണം സുനിശ്ചിതമാണ്.

🔸തങ്ങളെ പിന്തുടരുന്നവരുടെ കണ്ണ് വെട്ടിച്ച് ആൽബിയും റിച്ചാർഡും എത്തുന്നത് തെരേസയും ജോർജും താമസിക്കുന്ന വസതിയിലേക്കാണ്. തങ്ങൾ വന്ന സാഹചര്യവും അവസ്ഥയും കണക്കിലെടുത്ത് ദമ്പതിമാരോട് മാന്യമായി ഇടപഴകാൻ ആവില്ല എന്ന് ഇരുവർക്കും നന്നായി അറിയാം. ആയതിനാൽ ദമ്പതിമാരെ ബന്ദികളായി പിടിച്ച് വസതി താൽക്കാലികമായി കയ്യേറുകയാണ് ഇരുവരും ,ഇതല്ലാതെ മറ്റൊരു മാർഗവും അവരുടെ മുന്നിൽ ഉണ്ടായിരുന്നില്ല എന്നതാണ് സത്യം.

🔸രണ്ട് ദിവസം ,രണ്ടേ രണ്ട് ദിവസം ഒളിച്ച് താമസിക്കാൻ കഴിഞ്ഞാൽ മതി. അതിനകം തങ്ങളെ ജോലി ഏല്പിച്ച കാറ്റിൽബാച്ച് എത്തും. അയാൾ എത്തിയാൽ ഒരു ധൈര്യമാണ് ,തങ്ങൾക്ക് രക്ഷപ്പെടാനുള്ള വഴിയും വേണ്ട സഹായങ്ങളും സൗകര്യങ്ങളും ഒക്കെ അയാൾ നോക്കിക്കോളും. അത് വരെ എന്ത് വിലകൊടുത്തിട്ടായാലും എന്തൊക്കെ ബുദ്ധിമുട്ടുകൾ നേരിട്ടിട്ടായാലും പിടിച്ച് നിന്നേ പറ്റൂ. അതിന് ഒരു മറയാവാൻ ഈ വീടും, ദ്വീപും ഇവിടത്തെ കഥാപാത്രങ്ങളും ഒക്കെ വേണം.

🔸അടുത്ത രണ്ട് ദിവസത്തേക്ക് ജോർജും തെരേസയും ആൽബിയും റിച്ചാർഡും എല്ലാം നാല് ചുവരിനും ഒരു മേൽക്കൂരയ്ക്കും കീഴെ ജീവിക്കാൻ നിർബന്ധിക്കപ്പെടുകയാണ്, കാറ്റിൽബാച്ച് എത്തുന്നത് വരെ. വെടിയേറ്റ ആൽബിയുടെ അവസ്ഥയും ഒട്ടും നല്ലതല്ല ,മുറിവും വാർന്നു പോയ രക്തവും കാരണം എത്ര സമയം അയാൾക്ക് ബാക്കിയുണ്ട് എന്നതും പറയാനാവുന്നില്ല ,എല്ലാത്തിനും പുറമെ തങ്ങൾക്കൊപ്പം ഉള്ളവരെ പറ്റി ഉള്ള റിച്ചാർഡിന്റെ ചില നിഗമനങ്ങളും സംശയങ്ങളും അപകടകരമായ ചില വസ്തുതകളിലേക്കാണ് വിരൽ ചൂണ്ടിയതും.


Verdict : Good