331. Z (1969)

Director : Costa Gavras

Genre : Thriller

Rating : 8.2/10

Country : Algeria

Duration : 127 Minutes


🔸ചരിത്രം വളച്ചൊടിക്കപ്പെട്ടതാണ് എന്നും പാഠപുസ്തകങ്ങളിലും ചരിത്ര രേഖകളിലും നമ്മൾ വായിച്ചും കണ്ടും കേട്ടും അറിഞ്ഞ സത്യം എന്ന വസ്തുത പലപ്പോഴും കെട്ടിച്ചമച്ചതാണെന്നും നാളത്തെ ജനത എങ്ങനെ പെരുമാറണം എന്നും തങ്ങളെ എങ്ങനെ നോക്കി കാണണം എന്നും നിർബന്ധ ബുദ്ധിയുള്ള ഒരു കൂട്ടം വ്യക്തികൾ നടത്തിയ ഒത്തുതീർപ്പ് ആണെന്നും ഈയിടെ പുറത്തിറങ്ങിയ ഒരു ചിത്രത്തിൽ കാണാൻ കഴിയുക ഉണ്ടായി. സെഡ് എന്ന നാമത്തിൽ പ്രേക്ഷകന് മുന്നിൽ എത്തിയ ഈ ചിത്രം മേല്പറഞ്ഞ കാര്യത്തെ അക്ഷരാർത്ഥത്തിൽ സാധൂകരിക്കുന്നുണ്ട് ,എല്ലാ തരത്തിലും.

🔸സത്യം എന്നത് അനിവാര്യത ആണ് ,എത്രനാൾ മൂടി വെച്ചാലും നിഷേധിച്ചാലും ഒരുനാൾ മറനീക്കി പുറത്ത് വരിക തന്നെ ചെയ്യും ,എന്നാൽ ചില സത്യങ്ങൾ അതിൽ ഉൾപ്പെട്ടിരിക്കുന്ന വ്യക്തികളെയും ,സാമൂഹിക ചുറ്റുപാടുകളെയും സർവോപരി ആ സമയത്തെ നിലപാടുകളും അവസ്ഥയും ഒക്കെ കണക്കിലെടുക്കുമ്പോൾ മറഞ്ഞിരിക്കുന്നത് തന്നെയാണ് ഒരു പരിധി വരെ നല്ലത് എന്ന് പറയേണ്ടി വരും. ആ സത്യത്തിന് പിറകെ പോവാതെ പറഞ്ഞ് പഠിപ്പിച്ച നുണകൾ പാടി പരത്തുന്നത് തന്നെയാണ് നന്നാവുക ,ചിലത് വിസ്മരിക്കേണ്ടി വരിക തന്നെ ചെയ്യും.

🔸ഒരു നടനോ ,കഥാപാത്രത്തിനോ വേണ്ടിയുള്ള ചിത്രം അല്ല സെഡ്. ഒരു കഥാപാത്രം മരിക്കുന്നുണ്ട് ,അതും ദുരൂഹമായ സാഹചര്യത്തിൽ തന്നെ. എന്നാൽ മരിച്ച കഥാപാത്രമോ അതിന്റെ കരണങ്ങളോ അല്ല ചിത്രത്തിന്റെ വിഷയം. മരണശേഷം സംഭവിക്കുന്ന കാര്യങ്ങളാണ് ചിത്രം പ്രതിപാദിക്കുന്നത് ,എന്നാൽ ഇതൊരു പ്രേത കഥയുമല്ല. ഏകാധിപത്യ സമാനമായ ഭരണവും അതിനെ രൂക്ഷമായി എതിർക്കുന്ന പ്രതിപക്ഷവും തെരുവിലേക്കിറങ്ങിയ ഗ്രീസ് ആണ് ചിത്രത്തിന്റെ പശ്ചാത്തലം.

🔸ഭരണത്തിനും ഗവണ്മെന്റിനും എതിരെ കനത്ത എതിർപ്പാണ് പ്രതിപക്ഷം ഉന്നയിക്കുന്നത് ,ഇതിനായി പരസ്യമായി തെരുവിൽ ഇറങ്ങാനും പ്രതിഷേധിക്കാനും കയ്യേറാനും വരെ അവർ തയ്യാറാവുകയാണ്. തങ്ങളാൽ ആവുംവിധം പ്രക്ഷോഭം അടിച്ചമർത്താൻ ഗവണ്മെന്റ് ശ്രമിക്കുന്നുണ്ടെങ്കിലും അത് വിജയം ആവുന്നില്ല എന്നതാണ് സത്യം. ഒടുവിൽ മറ്റ് മാർഗങ്ങൾ ഏതുമില്ലാതെ ഒരു അറ്റ കൈ പ്രയോഗത്തിന് ഒരുങ്ങുകയാണ് ഭരണവർഗം.

🔸പ്രക്ഷോഭം നടക്കുന്നതിനിടെ പ്രതിപക്ഷ സംഘടനയുടെ നേതാവിനെ തെരുവിൽ വെച്ച് ഇല്ലാതാക്കുകയാണ് ഗവണ്മെന്റ് ,തെളിവുകൾ ഏതും ഇല്ലെങ്കിൽ കൂടിയും ആരാണ് ഇതിന് പിന്നിൽ എന്നത് ഏവർക്കും അറിയാവുന്ന കാര്യമായിരുന്നു. എന്നാൽ ശബ്ദം ഉയർത്തി ചോദ്യം ചെയ്യുക എന്നത് മരണത്തിന് തുല്യം ആയിരുന്നതിനാൽ ഒരു ജനത ഒന്നടങ്കം മൗനം പാലിച്ചു. അത് തന്നെയായിരുന്നു ഗവണ്മെന്റ് ആഗ്രഹിച്ചതും പ്രതീക്ഷിച്ചതും ,കിട്ടാവുന്നതിൽ ഏറ്റവും ശക്തമായ ആയുധം തന്നെ ,ഭയം എന്ന ആയുധം.

Verdict : Must Watch